إشادة ببطلي رمضان… “من دون عرض عضلات”

أشادت الصحافية جوزفين حبشي بأداء الممثلين جوزف بو نصار في مسلسل “راحوا”، وباسم مغنية في مسلسل “للموت”، معتبرةً أنّ رأيها “بلا مبالغة ولا عرض عضلات”.

وكتبت: “طول عمري بحب الاداء الطبيعي، من دون مبالغة أو عرض عضلات وانفعالات وفنجرة عيون وحشرجة صوت وملح وبهار ممكن ينزعوا طعم الطبخة اذا زادوا عن حدّن. طول عمري بحب الشخصيات اللي بتبيّن عادية، وبتتطور مع الوقت لتكشف ملامح مخباية من وجعها ومعاناتها. وهون تحديدا انا حابة ضوّي على ممثلين ٢ عم بيضوّوا ويوجّوا باداءن من خلال مسلسلات رمضان”.

وأضافت: “الاول هو الفنان الكبير جوزف بو نصار، اللي مش ناطر شهادتي، خصوصا انو انا تلميذتو بالمسرح ولاحقا بالصحافة بملحق دليل النهار لأكتر من ٢٠ سنة. هالعشرة الطويلة مع جوزف بو نصار سمحتلي اعرف قديش هو انسان حقيقي قبل ما يكون فنان، وقديش هو شخص طريف ومهضوم بالحقيقة اللي يمكن مش كتار بيعرفوها عنو. هالملامح الطريفة بشخصيتو ما كانت تبيّن كتير باعمالو الفنية السابقة، واذ بيجي دورو بمسلسل “راحوا” لي خلاه ينكشف قدامنا، متل صندوق الفرجة اللي مخبّى مشاعر ولا احلى، هي مزيج مدوّزن من الحنان والطيبة والطرافة والوجع والقسوة اللي بتنهار بسرعة قدام خوف البيّ على بناتو. جوزف بو نصار الرائع دايما، رائع اكتر بهالدور اللي بيشبهو كتير من جوا. حضورو واداءو الهن نكهة خاصة، وشخصيتو بكل تتبيلتها، هي حبة الكرز على مسلسل ” راحوا”.

وتابعت: “اما الممثل التاني فهو باسم مغنيّة اللي اكتشفت انا شخصيا قديشو مميّز من خلال مسلسل” تانغو”، واليوم عم يرجع يبهرني بشخصية عمر بمسلسل” للموت”. الحلو بباسم انو ما حاول بالاول يبالغ ليفرجينا عضلاتو التمثيلية. بالعكس، كان عم يمرق “مرور الكرام” اذا بيجوز التعبير، من دون ما يلفت كتير، راسم على وجو ماسك ال” بوكر فايس” بانتظار اللحظة اللي رح يكشف فيها عن وجعو ومعاناتو. ويا سلام على اللحظة اللي بلش فيها يشلح قناعو ويظهر عاري ، يا ظروف كما خلقتيني، ابن شارع وتعتير وظلم وقسوة، وخصوصا حب هو قشة الخلاص الوحيدة ببحر القسوة اللي انرمى فيها هو وطفل. حب، هو اوكسيجانو الوحيد واللي من دونو رح يختنق ورح بصير عاجز ، لهيك مش قبلان يرفع آلة التنفّس عن قلبو. حلو كتير اداءك يا باسم وكتير مقنع وحقيقي ، وانفجارك اجا بمحلو، من دون اي مبالغة بالاول”.

وختمت: “جوزف بو نصار وباسم مغنية، انتوا كمان ما احلاكن”.